As xornadas de Economía Crítica abordan as 'Emerxencias, transicións e desigualdades socioeconómicas'

Como explica o equipo promotor do encontro, “nos últimos anos, enfrontámonos a múltiples retos que nos indican unha situación altamente crítica para o futuro inmediato da humanidade. Facer fronte a estes retos esixe a diagnose de todas as emerxencias que deben ser atendidas, ademais da formulación de posibles camiños para transitar cara un mundo no que ditos retos poidan ser superados e que, por outra parte, permitan reducir as desigualdades existentes a diferentes niveis”. As xornadas contan esta vez con tres plenarios e coas tradicionais sesións de debate onde se presentarán cerca de cen comunicacións, así como espazos de diálogo con outras disciplinas e o activismo.

A sesión plenaria de ‘Emerxencias’ contará coa participación de Erika González, investigadora no Observatorio de Multinacionales de América Latina (OMAL), e de Antonio Turiel, científico titular no Institut de Ciències del Mar (CSIC). Na sesión de ‘Transicións’ participarán Santiago Álvarez Cantalapiedra, director de FUHEM Ecosocial, e Alicia Valero Delgado, directora do grupo de investigación de Ecoloxía Industrial no Instituto CIRCE da Universidade de Zaragoza. Por último, na sesión de ‘Desigualdades’ participarán Cristina Carrasco Bengoa, profesora de Teoría Económica na Universitat de Barcelona, e Xosé Manuel Beiras, catedrático de Estrutura Económica da Universidade de Santiago de Compostela, ambos xa retirados.

Como explican o equipo promotor, debido ás restricións impostas pola pandemia da Covid-19, as Xornadas desenvolveranse en liña a través da plataforma MS Teams e as diferentes intervencións estarán dispoñibles en Youtube. Tanto a consulta do programa como o proceso de inscrición pode realizarse a través da web das xornadas (http://www.asociacioneconomiacritica.org/jec/jec-2020-santiago-de-compostela/).