Presentada a iniciativa FASTFly 2035, centrada na intelixencia artificial aplicada ás operacións con drons

A nova Unidade Mixta presentada hoxe, que se centra na intelixencia artificial aplicada ás operacións con drons, dá continuidade ao proxecto iniciado en 2017, prevendo en total un investimento público-privado de 4 millóns de euros. Tal e como apuntou Conde, contribúe á retención e captación de talento, contando cun equipo de traballo de 17 investigadores e prevendo a creación de 10 novos empregos de alta cualificación. O obxectivo é achegar avances moi significativos que contribuirán a mellorar o gran reto do sector: a operatividade e a funcionalidade dos vehículos aéreos non tripulados. As instalacións do Polo Aeroespacial de Galicia en Rozas (Castro de Rei) serán a súa base de operacións para ensaios e demostracións, polo que o traballo será en coordinación permanente.

O vicepresidente económico sinalou que se trata da primeira Unidade Mixta de Investigación especializada en vehículos aéreos non tripulados, destacando que a iniciativa se puxo en marcha como resposta á demanda do mercado de vehículos aéreos non tripulados que poidan operar con maior seguridade e autonomía en escenarios máis complexos. O equipo non só traballa en desenvolvementos tecnolóxicos e ensaios que permitan ao dron ter maior independencia do piloto nestes entornos coa axuda da intelixencia artificial e a robótica, senón que tamén está colaborando na definición dun novo marco regulatorio que contemple voos autónomos e a súa integración no espazo aéreo.

O obxectivo agora é programar voos que vaian fóra da liña visual do piloto e que precisen da menor intervención humana; profundizar nestes traballos para o desenvolvemento de aeronaves con maior autonomía; e avanzar na xestión da enerxía que consomen. Trátase, polo tanto, de drons que, grazas á intelixencia artificial, cumpren os requisitos para operar en entornos de emerxencias, vixilancia de costas, e todo tipo de emisións de seguridade en espazos onde non hai infraestrutura para avións non tripulados.

O programa de Unidades Mixtas de Investigación impulsado pola Xunta favorece a cooperación entre os organismos de investigación e o tecido empresarial para realizar xuntos proxectos de I+D+i aliñados cos retos e prioridades da RIS3. A través das 8 convocatorias resoltas ata o momento, a Xunta apoiou 46 Unidades Mixtas: coa participación de 13 centros de coñecemento e 33 empresas, a mobilización de máis de 130 millóns de euros, e coa implicación de 700 profesionais.