Galicia e o Norte de Portugal apostan polo tren de alta velocidade e a transición dixital e piden máis cohesión territorial na Eurorrexión

O director xeral de Relacións Exteriores e coa UE, Jesús Gamallo, subliñou que a Eurorrexión Galicia Norte de Portugal é un exemplo en Europa de cooperación a ambos lados da fronteira, dende que se creou a Comunidade de Traballo en 1991. Para Gamallo, Galicia e o norte de Portugal son moito máis que cooperación e fondos europeos por esa identidade común, xeográfica e cultural a un lado e outro da raia.

Nesta liña, insistiu no plan de reactivación económica levado a cabo pola Eurorrexión durante a pandemia, que foi considerado polo Eurobarómetro do Comité de Rexións de Europa un exemplo de cooperación de proximidade. Ademais, engadiu que o novo cadro financeiro plurianual é a oportunidade para a transición enerxética, transición dixital e transición demográfica en Galicia e o norte de Portugal.

Xunto a Jesús Gamallo interviron o presidente da CCDR-Norte e da Comunidade de Traballo Galicia-Norte de Portugal, António Cunha, e o director da Agrupación Europea de Cooperación Territorial da Eurorrexión Galicia-Norte de Portugal (AECT-GNP), Nuno Almeida, cos que o director xeral de Relacións Institucionais e coa UE fixo fronte común á hora de reivindicar as necesidades da Eurorrexión e de atender aos desafíos que se lle presentan ante o novo marco financeiro.

Ademais, no transcurso do acto en Braga asinouse un convenio de colaboración entre a Confederación de Empresarios de Galicia (CEG) e a Confederación Empresarial do Minho (ConfMinho).