A Xunta solicitará unha reunión con Endesa para concretar alternativas que dean continuidade á central das Pontes

“Necesitamos solucións concretas, realidades”, dixo Conde logo de reunirse co grupo de traballo local nunha xuntanza que cualificou como “positiva”. “Seguimos traballando conxuntamente e, sobre todo, cunha visión compartida”, apuntou, e a Xunta “manterá a súa actitude construtiva e positiva” para que os proxectos que están neste momento sobre a mesa se poidan traducir en solucións concretas.

Nese sentido, asegurou que este esforzo conxunto tamén se vai dirixir a que o Goberno facilite os diferentes fondos europeos que poidan habilitar actuacións concretas en materia de formación ou en forma de axudas para as empresas a través dos fondos de transición xusta. Ao respecto, adiantou que o Executivo central terá “toda a colaboración da Xunta” desde o grupo de traballo local para identificar os criterios e as diferentes alternativas.

“Tanto a Xunta como o Concello, os sindicatos, os transportistas e a industria auxiliar estamos de acordo en que é o momento de pasar ás concrecións, ás solucións realistas para dar unha alternativa”, afirmou Conde. “Imos seguir implicados como ata o de agora”, apostilou.