Pesca invierte 270.000 euros en el acondicionamiento de la antigua fábrica de conservas Goday

Nota de prensa remitida por el Gabinete de Comunicación de la Consellería de Pesca e Asuntos Marítimos de la Xunta de Galicia:

O Consello da Xunta de Galicia autorizou a sinatura dun convenio de colaboración entre a Consellería de Pesca e Asuntos Marítimos e o Concello da Illa de Arousa para a realización das obras de acondicionamento do edificio da antiga Fábrica de Conservas Goday para actividades museísticas e de divulgación sobre o mar e a pesca. Este edificio, de propiedade municipal e que forma parte do inventario xeral do patrimonio cultural de Galicia, atópase situado na rúa Palmeira, nº 25 desta localidade arousana.

A través deste convenio, o departamento que dirixe Carmen Gallego aportará un total de 270.000 euros para o acondicionamento final do edificio que permitirá pór en marcha, canto antes, as actividades que se prevén realizar nel. O financiamento para a execución das obras distribuirase en dúas anualidades: 2007 e 2008.

A Consellería de Pesca e Asuntos Marítimos ten entre as súas competencias as relativas á divulgación en materias referidas á pesca, o mar e as actividades marítimo- pesqueiras. De feito, no programa de actuacións para a vixente lexislatura promóvese dende este departamento autonómico a necesidade de dotar de pequenos centros de divulgación aos portos do litoral con tradición pesqueira, que cumpran a función de dar a coñecer a realidade do mundo do mar, potencien o recoñecemento social do pescador, favorezan as prácticas de pesca responsable e fomenten o consumo dos produtos pesqueiros de calidade da frota artesanal.

Ademais, a intención da Consellería é colaborar e cooperar con aquelas entidades que, como o Concello da Illa de Arousa, desenvolvan accións de divulgación mediante centros permanentes, que programen e executen actividades ao longo de todo o ano. Así, a colaboración para o proxecto de acondicionamento da antiga conserveira Goday cumpre cos obxectivos marcados polo departamento de Pesca e por este motivo é apoiado.

A vixencia do convenio de colaboración que asinarán ambas as dúas administracións non poderá exceder do 30 novembro de 2008. Enténdese que antes desta data as obras deberán estar rematadas e ter a conformidade da Consellería de Pesca e Asuntos Marítimos.